Soyuq Xəstə Edərmi?

Xəstəliyə səbəb olan soyuq hava deyil mikroorqanizmlər, o cümlədən viruslardır. Kəskin respirator virus infeksiyalarının mütləq bir törədici virusu var. Yəni, viruslar olmazsa xəstəlik də olmaz və viruslardan söhbət getdiyinə görə demək ki, onlar bizə başqa birindən yoluxurlar. Bunu elm belə söyləyir. Lakin, ta qədimdən bəri insanların təcrübə etdikləri bir hadisə var. Nə zaman ki, soyuqda qalırsan onda xəstələnirsən. Bu prosesi soyuqdəymə adlandırmışlar. Həqiqətən də fakt budur ki, soyuğa məruz qaldıqda xəstələnmə baş verir. Bu xəstələnmə boğaz ağrısı, burun axması, öskürək, halsızlıq, üşütmə, qızdırma ilə müşayiət olunur. Məsələ burasındadır ki, həm elmin dediyi, həm də insanların müşahidə etdikləri doğrudur. Bu belə baş verir: Bizim ətrafımız viruslarla və digər mikroorqanizmlərlə doludur. Xüsusən ətraf mühitlə açıq əlaqədə olan tənəffüs yollarında bu sistemin kəskin iltihabını törədən virusların olması mümkündür. Soyuq hava orqanizm üçün bir stress mühitidir, soyuqda bədənimiz enerjinin bir hissəsini istiliyi saxlamaq üçün sərf edir, bu da immun sisteminə sərf olunan enerjinin azalmasına və onun zəifləməsinə səbəb olur. Digər tərəfdən soyuq və quru hava tənəffüs yollarımızın viruslara qarşı birincili bariyer funksiyası yerinə yetirən mukozasının qurumasına, yerli immunoglobulinlərin zəifləməsinə, nəticədə qoruyucu funksiyasının tamamilə sıradan çıxmasına səbəb olur. Beləliklə, soyuq hava infeksiyalar üçün əlverişli mühit yaradır. Bu, fürsət axtaran virusların tənəffüs yollarımızın zədələnmiş mukozasından asanlıqla epitel hüceyrələrinə daxil olub xəstəlik yaratmasına, bizim də xəstələnməyimizə səbəb olur.